腹瀉
近日門診腹瀉嘅病人都唔少，所以今日會簡單講一下腹瀉嘅處理。
轉季，秋季溫度適中，病毒存活率高，流行性感冒、腹瀉都會多發。
☆發現疴嘔症狀，首要條件係。防。止。脫。水。，補充電解質，華人傳統上會飲淡粥水，其實就係鹽糖水，都巿人要方便，可以飲保礦力，飲用嘅技巧係，小量多次飲用，即係每次倒出黎大概飲一至兩啖（30-50毫升左右），常溫飲用，唔要冰凍刺激黏膜，亦唔需要煲熱飲。
☆禁食，疴嘔期間無需進食，直至症狀緩解或腸道功能恢復，恢復期忌油、忌甜、忌刺激性食物，可以選擇瘦肉粥、湯麵、水餃等較易入口嘅低油食品；豆類、根莖類、洋蔥、硬身水果等等難消化或產氣食品都不適合；咖啡、奶茶、忌廉蛋糕、辛辣、油炸食品唔洗講都屬唔適合類型。
☆注意腹痛情況，如果便後仍然有劇痛、壓榨式扭轉痛，需要搵醫生處理。
☆注意精神狀態，尤其係兒童，如果伴有昏睡、神智不清，急送醫院處理。
☆熱敷，如果覺得抱住暖水袋比較舒適，就按身體需要去做，熱敷唔係必要。
☆留意疴嘔次數，如果疴嘔數次仍然未有緩解，或者疴嘔十數次以上，需考慮到門診。
☆成藥使用，高熱，攝氏38.5度或者以上，可以使用退熱藥（非處方撲熱息痛Panadol），退熱藥用上後反覆高熱，需要考慮求診。
☆成藥使用2，不建議使用止瀉藥，腹瀉係將刺激物排出嘅過程，人工阻礙腸胃蠕動、禁止排便，會使病毒或細菌更難排出體外，阻礙疾病痊癒。止瀉藥係俾次數過多，例如超過十數次，或者過度頻繁，例如瀉後不止反覆如廁嘅情況使用，止瀉藥建議按醫囑使用。
☆益生菌使用，可以選擇優質嘅使用，對腹瀉有正向幫助，巿場上劣質營養素較多，注意小心選擇。
希望以上資訊幫到大家。
Comments