小顏術

小顏術

因為歐陽醫生有做整脊，所以病人查詢有無提供「小顏術」。

歐陽醫生有提供正骨服務（可以理解為整脊、骨盆前傾治療、長短腳治療、拗柴復位等），小顏術並無提供，因為頭、面骨，醫學上面屬於不可動關節。

醫學角度，頭、面骨喺1歲半之後就會將⻣縫閉合（即腦囟閂埋），基本上唔存在可動空間，又叫不動關節、纖維關節，頭部唯一可動關節係顳下頜關節，所以，有聽過一個病叫甩牙骹（顳頜關節脫位）、或顳頜關節炎，但就無病叫做甩頭骨骹、甩面骹之類，只有頭骨、顏面⻣骨折。

頭骨、軟組織解剖圖連結：

頭骨X光連結：

整脊後，身體代謝會變好，歐陽醫生有病人因為整完脊瘦咗一圈。

唔整骨，整軟組織會唔會瘦，答案都係會嘅，一般門診推完小腿、摩腹推肚腩，都會即場瘦一圈（1-3cm都會有，視乎病人水腫程度）。個人理解小顏術只會移動動軟組織，無法移動頭骨，除非業者有CT、X光等實質證據證明。

歐陽醫生唔會用「瘦身」黎做整脊或推拿嘅招來，個人習慣問題。以後會否開設美容診所，或者開展其他商業模式，屬後話，暫時黎講未有呢個打算。

骶髂關節（即係尾龍骨、臀部位置），係移動好少嘅關節，學者有證明大概有2mm可動空間。小顏術廣告話鼻骨可移動最高4mm（鼻骨分有硬骨同軟骨），講緊係半隻尾指甲，無醫療監管嘅好處係暢所欲言無需負責。

醫療，係一種信仰，信者得救，有同業（唔講美業，美業唔需要醫療規範，更自由）鍾意銷售骨面骨可用手法位移，屬信仰自由吧。

Recent Posts