中藥與抗疫

中藥與抗疫

我係中醫，長年都用針、推、中藥。

之但係，呢幾日出嘅論文新聞，我係有責任轉，但某啲係轉唔落手，點解？

論文有轉，因為內文同臨床證型預測相近，咪大家一齊參考下臨床用藥囉，好過個個保健都話成両成両補氣藥咁用啦，睇勻成本溫病學，藥係咁用嘎咩？明顯唔係囉！

篇論文嘅問題，唉，寫到成本教課書咁⋯我唔抗拒，但，只會當教課書參考囉，臨床醫生有邊個跟足教課書醫倒病嘎？基本上無，教課書係基礎，臨床用藥唔會偏離基本理論，即係寒者熱之、熱之寒之、實則虛之、虛則實之之類，仲有八綱、六經之類⋯唔計嗰啲特殊流派。

論文基礎，要有方法、病例、對照組、治癒率之類，明顯篇論文係無嘅，所以，真係拎黎當教課書參考就夠嘎喇。

另外，其他藥商又開始賣藥了，楊進老師條方，好早賣斷巿，正常，楊進老師係現代溫病大家呀，劑藥好用，好多百姓都有習慣買黎傍身。不過，成藥一般係輕症、慢性期用嘛，急就湯藥，丸散緩也吖嘛，病例就係，早年老師同我上過北京，大家返黎都病咗有咳，大家都有包成藥，咁大家都有食，當然，唔夠力，係有效但唔夠力，結果老師再要煲茶，我自己就再加服濃縮中藥～

故事係講，病重藥輕、藥重病輕都唔得。今朝要講雙黃，好喜歡伍醫生呢句，借分享，大意係：「咪盲搶雙黃，藥黎嘎，唔係雙黃蓮蓉月呀，月餅食多都滯，亂食藥食多會傷身！」

我都一直好奇，點解今年唔搶板藍根，估計就係沙士年代炒賣過嘅嘢少咗巿場價值。原來今次炒雙黃，即金銀花、黃芩、連翹嘅合劑，點解唔單炒金銀花呢？因為金銀花向來都炒到好貴，但配住黃芩連翹呢種相對平嘅藥材，可以一併帶動炒價吧？

溫病仲有好多藥可以用嘎：薄荷、西瓜皮、丹參、大青葉、生地等等⋯我比較有興趣留意事情嘅發展。

史東記講緊中藥係安慰劑嘅問題，對唔住，不敢恭維，中藥一向有中藥療效，中藥有佢處方規律，行家一齊驗證過好多門診案例，中醫絕對快！好嘅中醫、好嘅醫學營養，配合癌症術後保健可以活超過廿年，有案例，唔止得一百日囉。

既然我講到好，點解現階段嘅病癒率仲係低？瘟疫從來都難治嘎喇，唔係都唔會有清代溫病四大家啦，更何況，病毒性疾病，西醫素來都無太多好辦法。以生蛇（水痘帶狀皰疹病毒）、肝炎為例，大家都明肝損可以去到幾嚴重啦。

#雙黃連有用但必須配伍使用

#中醫必須對證及對症或對病用藥

#期待疫情盡快散去

#搶唔倒雙黃連其實其他清熱解毒藥一樣得

#口罩同樣道理民間搶曬黎擺會引起問題

#前線醫生無藥用

#前線醫生無口罩用

#全民攬炒

#理智啲

#理智購買

#理智用藥

#澳門中醫

#淺談中藥

#雙黃連

#新聞