幾時會唔痛？
- Melody Doctor of TCM
- Oct 19, 2023
- 1 min read
呢個問題係出自84歲黎門診保健嘅婆婆，點解會講「保健」而唔係講「醫病」，因為初診嗰日就已經知道，婆婆嘅「痛」係唔會停止，只可以減輕（包括減少發作同痛楚程度降低）。
婆婆好乖，每個星期都會黎門診一次，今日問：「幾時會唔痛呢？」，歐陽醫生答：「唔喺度（指去世）就唔痛喇，一日喺度一日都會痛，好似我咁都有痛，但痛得黎識去醫就得。」
老年腰腿痛，包括骨性關節炎、肌少症及脊椎小關節錯縫，部分有伴隨慢性疾病如高血壓、高血糖或高血脂。當中只有肌少症同小關節錯縫可以完全糾正，其他無辦法復健到同後生一樣。亦所以痛係伴隨終生，門診只可以將疼痛減輕，最好嘅情況都只係減到好輕微 /或減到唔影響生活。
年過70，無（嚴重嘅）骨性關節炎、無三高等慢性病，一般都無長期痛症，門診間中有見，但實屬罕見。
84歲，一週一診，6月初診至今4個月，長短腳改善、小腿抽搐緊痛改善、膝痛減、腰痛減，血糖血壓穩定有下降，肌肉同肌力增長，已經好叻。
見到病人康復，就係門診最大嘅快樂來源，滿足感勝於一切。
Comments