發炎、消炎
以下係門診模擬情境：
病人：喉嚨痛。
醫生：喉嚨發炎，開幾粒消炎藥俾你。
病人：好。
～～～～～～～～～～～～～～～～～～～～～～～～～～～～～
病人：眼紅、痛、痕。
醫生：結膜發炎，開枝消炎眼藥水俾你。
病人：好。
～～～～～～～～～～～～～～～～～～～～～～～～～～～～～
病人：手痛、腫腫地。
醫生：筋腱發炎，開啲消炎藥俾你。
病人：好。
⋯⋯
以下省略萬千個一樣嘅病案⋯
～～～～～～～～～～～～～～～～～～～～～～～～～～～～～
發炎、消炎，聽得最多，病人只知道，乜病都係發炎，乜藥都係用黎消炎。
真嘎，好多病都係發炎：咽炎、鼻炎、中耳炎、暗瘡發炎、結膜炎、牙艱炎、肺炎、腱鞘炎、跟腱炎、膽囊炎、退行性膝關節炎／骨性關節炎等等⋯
～～～～～～～～～～～～～～～～～～～～～～～～～～～～～
究竟，有幾多人了解過咩叫「炎」？點樣用藥去「消炎」？
發炎反應、炎性反應，俗稱發炎，英文係inflammation，拉丁語原文意思係火燒。定義就係局部組織見到一片紅、腫、熱、痛甚至局部組織失去功能。分有急性發炎與慢性發炎。原因係身體受到刺激，激發咗身體嘅防禦系統，原因可以係外傷、出血、病原體感染（病毒、細菌、真菌、寄生蟲等）、某啲致敏物質（毛蟲、堅果、海鮮、水果、塵蟎、花粉等）。生理機轉係細胞因子活化咗一啲致炎因子，致炎物常見嘅有前列腺素、血管擴張素、組織胺、IL-17、白血球白三烯等等，誘發炎症反應嘅重要前驅物係一種酵素，叫COX。
～～～～～～～～～～～～～～～～～～～～～～～～～～～～～
炎症可怕嗎？係咪一定要消炎？係咪鏟除一切炎症就等於無病？
炎症，係我地人體基本生理反應，即是話，只要你係一個人，就會識得發炎，要袪除一切炎症，代表無咗血管、淋巴系統嘅正常生理現象，即是，完全唔發生炎症反應嘅，唔係一個活人。
消炎嘅做法，係在於對炎症反應嘅相對調控，調控到，發炎可以有，但唔可以俾炎症反應過劇進一步傷害身體，控制發炎情況下盡早針對病因作處理。
而所謂嘅消炎藥，其實就係抗生素、抗病毒藥、抗過敏藥、止痛藥或者激素，「消炎藥」只係臨床安俾病人比較易理解嘅藥物統稱，而乜病都叫佢「發炎」，亦係臨床醫護講啲比較易明嘅概念俾病人知道，如果，一個臨床醫生同病人講實際醫學理論，我以腰椎間盤突出症為例，如果臨床醫生同病人講，因為病人血清裏面炎症因子水平如IL-18,IL-6,Hs-CRP等等升高，而引起發炎反應，相信個病人會完全唔知個醫生喺度噏乜⋯
～～～～～～～～～～～～～～～～～～～～～～～～～～～～～
發炎並唔可怕，因為要有炎症反應，組織先會得到修復，關鍵係，點樣減少發炎，針對病因處理炎症。
病向淺中醫，未病先防係好重要嘅概念。
～～～～～～～～～～～～～～～～～～～～～～～～～～～～～
今日係母親節，祝大家母親身體健康，事事順心。
Comments