把脈
把脈中醫嘅診查手段之一。
四診有望聞問切，主要針對內科病而言，其實外科、傷科處理，其實一樣用到視觸叩聽，視觸叩聽係西醫嘅「四診」。
把脈就係帶黎人們最大嘅神秘感，所以電視劇、電影、小說等等都唔少把脈嘅橋段，例如，宮廷劇阿太醫拎條紅線隔開五丈遠黎把脈、古裝劇最鍾意講嘅恭喜你有喜脈之類、周星馳電影嘅將軍令等等。
歐陽醫生同你講現實、講事實，將你由劇集幻想帶翻返黎，常規門診，醫生把脈會按常規二十八脈，但最常用係浮沈遲數大小滑澀弦緊代等等，芤革促散微要去醫院搵，門診難見啲。（呢度係門診常見脈經驗大概寫一下，唔代表全部醫生嘅意見。）
現實係，常規門診用三指把脈，用二十八脈黎輔助開處方、斷證，嗰啲好特殊嘅流派，隔空把脈、把到追返上祖宗十八代、把脈準過X光嗰啲另類流脈，講到底其實係氣功嘅玩法，普遍臨床醫生都唔會用，所以，聽過下「嗯」一聲就夠了，以病人角度唔需要刻意參詳，因為，要把脈準過X光，歐陽醫都會開返張驗單轉介病人去照返張真嘅X光，有證有據真真實實大家都睇得明，對嗎。
學士學生年代嘅歐陽醫生都唔識把脈，覺得好難學，領牌十一年後嘅歐陽醫生，對把脈已經變成一種習慣，其實日積月累就可以訓練出指感，呢點係毫無疑問嘅，所以，把脈真係唔係咁神秘嘅一件事。
把脈，其實就係摸動脈嘅博動感，意思就係以血管嘅緊張度、彈性；血液嘅充盈度、流𣈱程度；肌膚嘅溫度、濕度等等黎評估人身體嘅疾病。例如，月經期間激素影響，血液充盈度高，就會有滑脈，而月經滑脈同懷孕滑脈其實相似，不過，懷孕嘅脈象常見會黎得更有力。痛症，指急性痛，痛得好緊要，會見緊脈，痛到咩咁，梗係會繃緊攣縮啦，緊脈係咁樣黎。夜瞓、失眠，可以見弦脈，因為呢兩種狀態，血液充盈度唔夠好，身體就會反應性收縮血管，以維持體液嘅壓力，方便運輸去身體各地，所以，慢性失眠，會有數、細等脈象，就係身體已經谷咗一輪，點整緊啲血管都唔夠血用，血管入面唔夠血呀。
用比較寫實嘅角度黎寫，解釋中醫把脈到底是甚麼一回事，臨床把脈其實唔係咁神秘嘅，無將軍令嘎囉。
Comments