雜病
迎接復常嘅日子，真係唔想寫COVID相關嘅文章，但我地嘅生活離不開COVID，COVID已經成為長久留存世上嘅病毒，會不斷變化，不斷更新，我地可以做嘅只能面對同克服，有事黎到就見招拆招。
雜病，開放復常後睇得最多就係雜病。未開放未有陽前基本門診都係傷科痛症多，唔洗解釋，從醫初起就係針對傷科痛症為主，熟人有傷有痛自然識約我；開放初陽期同初轉陰期就主力醫退燒、止咳、化痰；開放穩定期，常規傷科痛症病人回歸，其次最多就係雜病，暫時所見陽後不適有：失眠、頭痛、胸悶氣短、皮膚搔癢、頭暈、面癱、疲累、畏風、抑鬱焦慮等。
都係嗰句，信邊個就搵邊個醫，雜病中，面癱、疲累、畏風、胸悶算係比較易處理嘅症狀，涉及免疫系統同神經系統，治療就比較複雜，所需嘅治療時間亦相應增長。
好多時啲中醫醫案，僅作參考，嗰啲醫案話二十年失眠，針兩三次完全康復斷尾，就算係真都只係屬特例，唔係全球統一治療金標準，試過有焦慮抑鬱嘅病人同我講，針完灸飲埋中藥好咗好多，一年後先輕度復發，我都會視作病人心態好，依從性高，對針、藥嘅敏感度高，但唔會100%都係咁易醫，本身涉及呢兩個系統嘅疾病就係難治病。
亦有病人表示好擔心下一波COVID到來，歐陽醫生意見係既來之則安之，對未知嘅事作恐懼太無謂，因為COVID絕對可以對症治療，中藥有中藥嘅辦法，西藥亦有抗病毒專用藥，談及不治之症，係命運使然，人類醫學發展史上就係不斷搵方法減輕疾病帶黎嘅痛苦或傷害，即係盡力去做好要做嘅，與其擔憂，不如喺平靜嘅日子裏好好地過好每一日。
Comments