長短腳
有體徵嘅長短腳，行路時因為兩雙腳一長一短，會側身一枴一枴咁行路，中立企直時，兩邊肩會呈一高一低。
病人通常會因為長期膝痛，或長期肩、頸、腰、背痛到門診求治。
長短腳，有分成「結構性」同「功能性」。
結構性長短腳，係指兩邊腳長度發育不良，兩邊長度差超過2cm，若果結構上超過3－6cm，而且保守治療效果唔理想，就要考慮手術治療，當然，發育不良嘅病人唔係臨床上常嘅。
功能性長短腳，係指X型腳、O型腳、骨盆偏歪，脊柱側彎等骨頭問題，或者係下肢、脊柱肌肉、韌帶、筋膜等異常繃緊，失去彈性，失去回正能力引起。可以引起症狀包括，長期單一部位或多個部位慢性疼痛，甚至乏力，影響日常生活。
治療方法包括針灸、推拿、整脊、運動康復、護具配合等，多數可以解除症狀。
臨床亦有複合型骨盆偏歪，即係無顯顯長短腳，但有長期慢性腰、膝疼痛，檢查可發現骨頭、軟組織嘅問題，治療方法同上。
肌肉骨骼系統嘅長年慢性疼痛，嚴重會引起失眠、影響休息質量，長遠令身體産生氣血兩虛問題。
臨床上遇到睇厭醫生嘅病人太多，希望文章可以為大家帶黎正面信息，其實好多不適同症狀都可以減輕、緩解或根除。
Comments