————————————————————————
門診高咨詢度問題之一，點解歐陽醫生針灸時唔見有電針機（俗語係針住駁啲電），或低週波（或稱電子鎮痛貼、低（中）頻治療儀、脈沖治療儀等）配合治療。
其實診所有電針機，只係太多數病人嘅病症用唔到，所無去用。
好簡單嘅一件事係，醫痛症，做完整復推拿手法，又落埋針，已經鎮痛，何需再加電？醫內科，可以飲中藥，亦可以用針法，針法係用傳統針法催氣行氣，靠病人本身嘅氣嘅流動（可以理解為細胞電子傳導、生物電，當然「氣」仲包含其他方面），已經將疾病緩解，又唔需要再駁電。
電針，歐陽醫生個人喜好係用於萎縮性疾病，即係面癱、中風偏癱、肌肉萎縮之類嘅病，間中會喺新傷嚴重或康復力弱嘅病人身上。即是話，歐陽醫生門診上以電鎮痛嘅頻次唔多。
————————————————————————
家用電子鎮痛，其實已經好普及，如圖（圖片取自網絡），病人都鍾意自己買黎用，鎮痛，唔洗食咁多止痛藥。
好多老人家都鍾意買嗰間X治，價格由十幾年前五萬，漲到依家七萬港紙（價錢係病人描述），購買理由大概係因為升咗級，要不斷買新款，另一理由係售賣機構宣稱療效甚強，百利而無一害等：如「細胞的新陳代謝及儲氧功能提升，促進血液循環，保持血液的弱減性，特別推薦給壓力大，精神容易緊張及失眠人士選用，促進健康，絕無副作用，用於頭部以上的不適及美容，局部治療筆加強患處的治療，負離子被譽為空氣中的維他命，能達到自然環境的標準，令您沐浴在森林、雨後草原及瀑布之中。」等等。（資料源自網站）
而老人家以外，長期痛症嘅病人（中壯年人）會買常見嘅低頻、中頻或脈沖治療儀，價錢由幾百到上千不等。
低頻（0.1至1000赫茲（Hz））、中頻（1000至10000赫茲）、脈沖電療儀（1-150赫茲），醫學上使用，有鎮痛、興奮肌肉、加強血液循環等作用。
普遍禁忌症係有起搏器、高血壓、骨折、傷口、發燒、癌症等病人。
唔反對個人喜好使用電子鎮痛，道理同食止痛藥一樣，但歐陽醫生會溫馨提示大家正視疾病本質，針對病因處理，針對病因，先有得斷尾。抽筋，老年人常見，要補類雌激素、鈣鎂鋅蛋白等營養；慢性炎症、痛症，有關節微錯縫就做復位、有脊柱偏歪就做整復、肌肉太緊就做伸展、肌力太弱就補蛋白、練肌力。如果一唔電就痛，必須正視問題，唔好自行日電夜電，醫生門診見過實例，日電夜電自行鎮痛，拖到脊神經被壓逼、水腫，痛到瞓到瞓唔倒先黎門診，朋友門診見過實例，瘋狂電療刺激血循環，將本身穩定嘅癌細胞擴散到末期。
自行使用鎮痛方法，必須用之有度，詳情請咨詢你信任嘅醫生/治療師。
————————————————————————
Comments