瑜珈與整脊
每次門診遇到脊椎問題嘅病人，高低膊、厚薄背、長短腳等等，都會建議病人老老實實照張整脊用嘅X光片，正式將脊椎問題理好，就會減少痛楚復發。
病人好多時都反問，我唔整脊，自己去練瑜珈得唔得？
一般歐陽醫生都會答，只要你搵倒一個識幫你檢查、診斷、針對脊椎問題嘅人幫你做倒骨頭復位、韌帶肌腱軟組織運動康復嘅人，唔理佢係教瑜珈、教普拉提、做中醫、做美式整脊、物理治療師，甚至只係單純一個素人，你都可以搵佢，只要你信邊個，覺得邊個夠專業，你就可以搵佢幫你醫病。
—————————————————————
瑜珈，瑜珈好多動作，歐陽醫生都會喺臨床上用到，因為，瑜珈只係一種運動嘅方式，人類嘅肌肉正常解剖下都一樣，康復嘅運動，德國人發明就叫普拉提、印度人發明就叫瑜珈、新西蘭人發明嘅就叫麥肯基療法、中醫整脊有龍氏、韋氏嘅康復方法、古中國運動可以叫氣功、八段錦、洗髓經。
對歐陽醫生黎講，只要係對症嘅運動方式，都係好嘅康復方法，只要係加重損傷嘅運動方式，都唔建議去做。
—————————————————————
舉個例，附圖動作叫做Sage Marichi（圖片取自網絡），係瑜珈嘅一種體式，佢嘅好處係可以放鬆下腰背嘅肌肉，但如果 閣下係患有彈響髖嘅，呢個動作。絕。對。有條件。誘。發。髖關節。疼。痛。加。重。
—————————————————————
門診終於叫累積咗一定年資，見過嘅病人唔少，有練運動更好嘅人，有練運動加重病情嘅人。
因為，好多時運動大班，無辦法個性化設計教學，幾專業嘅運動導師，都唔會針對叫你去照個X光，攞個量角器幫你量度，甚少會去處理骨頭問題，因為，呢個係整脊門診醫生做嘅事。同樣地，斷咗骨（移位性、粉碎性）需要去醫院搵骨科手術醫生，唔會由整脊門診去處理。
—————————————————————
Comentarios