好怕見倒啲嘩眾取寵文章/視頻，中醫難發展，其中一個好重要嘅重點係，傳統華人思想「教識徒弟無師父」，而。絕。對。唔。會。係因為現代中醫要學埋西醫。
假設現代中醫唔學識西醫，正確黎講應該叫現代醫學或者主流醫學，就GG了，因為，絕對有機會出醫療事故，例如：
例1:唔識咩叫G6PD缺乏，開咗啲金銀花、大黃、薄荷之類，好彩就唔出事，如果唔好彩搞到個病人溶血呢？
例2:唔識睇X光片，即係睇唔倒骨折同椎弓狹裂，骨折強行拔伸可以導致原本無移位嘅骨頭移位致使無法癒合，椎弓狹裂斜扳法屬慎用手法，道理同前。
例3:唔識咩叫耳石症，本來復個位就止暈了，唔識就變相要病人一味飲止暈藥，搞到飲咗藥好啲停藥又復發，無意中就dump咗症。
引用返原文嘅例子，白虎湯醫糖尿病咳嗽，中醫所述係醫四大症：大熱、大汗、大渴、脈洪大，即係指病人發緊高燒，而「經現代藥理研究證明，白虎湯有明顯的退熱作用，能增強腹腔巨噬細胞的吞噬功能，同時能提高血清溶菌酶的含量，促進淋巴細胞轉化。」，咳嗽咁啱發緊高燒，絕對適用，完全唔關糖唔糖尿病嘅事。
再黎又講白虎加人參湯，教科書有寫係可以拎黎醫糖尿病：
「1.肺胃燥热，证候：烦渴引饮，消谷善饥，小便色黄、次频量多，身形渐瘦，舌红苔少，脉滑数。治则：清热生津，止渴除烦。主方：。白。虎。加。人。参汤。或玉泉丸、玉液汤等。
2.肠燥津伤⋯增液承气汤。
3.肝肾阴虚⋯六味地黄丸。
4.脾胃气虚⋯七味白术散或参苓白术散。
5.阴阳两亏⋯金匮肾气丸。
6.湿热中阻⋯黄芩滑石汤。」
傷寒原文是咁的：
「白虎加人參湯 (168)【內容】
傷寒，若吐、若下後，七八日不解，熱結在裡，表裡俱熱，時時惡風，大渴，舌上乾燥而煩，欲飲水數升者，白虎加人參湯主之。
（白虎加人參湯方 知母六兩 石膏一斤，碎 甘草二兩，炙 人參二兩 粳米六台）
右五味，以水一斗，煮米熟，湯成去滓，溫服一升，日三服。此方立夏後、立秋前，乃可服；立秋後不可服；正月、二月、三月尚凜冷，亦不可與服之，與之則嘔利而腹痛。諸亡血虛家，亦不可與，得之則腹痛利者，但可溫之，當愈。」
傷寒大家做現代藥現，發現白虎加人參湯原配伍有住最佳嘅降糖作用，而單藥中，知母、人參亦帶降糖作用。
本來臨床用落，中醫同西醫往往不謀而合，因為真理永遠是對的，真理恆久不變。
如果，身為中醫，用中藥、用針推醫唔好病，先怪自己學藝不精，再怪自己睇書太少，然後怪自己無跟倒好老師學習，就唔好怪學校要俾你學埋西醫、西藥、西診等等科目，okay？
門診曾經聽過病人咁講，睇醫生鍾意睇新派中醫，因為有讀西醫識病理藥理，唔怕雞同鴨講，溝通比較順暢。呢度係講，現代中醫識得更多，係優勢，並唔係劣勢，書本知識好重要，另外，傳統抄方跟診都好重要，因為係將新醫生臨床提升一個極佳嘅手段，跟診係指好師父肯教你處方思路，用藥原則，唔係指盲目抄方等自己領悟出黎，如果跟診老師同你講一句「有乜自己領悟啦」，可以基本確定呢個老師唔會想教你嘢，最少佢講呢句話嘅嗰刻必定係唔想教你。
Comments