胃脹點算好？

胃脹呢個問題，係離唔開門診嘅。

胃部本來就有空氣，大約一隻水杯嘅量。但如果經常上腹脹、一日內經常噯氣、飯後更脹、甚至脹到痛，可能就要到門診處理。

無病性質嘅胃脹，係進食太多、太快或者食過多產氣食物引起。

胃脹可以由胃腸道本身問題，例如胃潰瘍、十二指腸潰瘍、腸道腫瘤、瘜肉、腸粘連、習慣性便秘等等引起，亦可以由腹部積水、腹部腫瘤等引起，或膽囊結石、或者由情緒，如喪偶、學習、工作、家庭壓力等引起。

＝＝＝＝＝＝＝＝＝＝＝＝＝＝＝＝＝＝＝＝＝

中醫針推治療，一般以肝、脾、胃經為主，跟據證型調整配穴，歐陽醫生好多時會配合做針後腹部推拿，臨床經驗係比單純針灸收效更佳。

中醫內科治療，跟據證型，虛則補之，實則瀉之，治療湯藥之多不勝數保和丸、平胃散、越鞠丸、補中益氣湯、半夏瀉心湯、逍遙散。

自行處理方法提議：

1－腹式呼吸，每晚臨瞓前做，可以幾分數，可以十幾分鐘，甚至可以做到瞓著。

2－臍周按摩，配合用潤膚露或油，輕柔中帶深度，按到聽到腸鳴。

3－勿過飽，晚餐食到唔餓就夠。

4－飲食均衡，精粗結合。

5－記低令自己腹氣食物，發作期減少食用，例如豆類、蕃薯、芋頭、椰菜、椰菜花、瓜類、炸物、甜品等。

6－每日定時大便，大便理想係日一次，成條狀不乾不爛。

7－飯後不要馬上平卧。

湯水茶療：

（食療亦需辨證論治，可向註冊中醫查詢）

谷麥芽茶：麥芽10克、谷芽10克、陳皮1 塊。適當水量，水滾後煲20－30分鐘。授乳期婦女不宜使用。

山楂布渣葉茶：山楂10克、布渣葉10克、大棗10克。適當水量，水滾後煲10－15分鐘。反酸者、消化道潰瘍慎用。

＝＝＝＝＝＝＝＝＝＝＝＝＝＝＝＝＝＝＝＝＝

成年後腸道益生菌、功能逐年下降，必須配合良好生活習慣才能養好腸胃，唔好好保養，好易變成「成年紀大、機器壞」，「四肢瘦、腹部脹」係唔少老年人嘅寫照，多關懷家中長者，多關愛自己。

Recent Posts