腸胃病與飲食習慣
- Melody Doctor of TCM
- 4 hours ago
- 2 min read
門診腸胃病嘅人士佔絕大多數，俗語講「人生三得」，就係食（飲食）、瞓（睡眠）、疴（排二便）三樣都良好，「三得」好嘅人，難生病，「三得」其中一樣或以上出問題，長久以後必定病，只係「病」得唔同程度。
而普遍大家對「病」嘅感覺同認知唔同，亦引致病人喺唔同深淺嘅時候求診。例如，有病人行路覺得關節卡卡地唔太順暢，就會到門診處理；但有病人係等到痛到無辦法完整行到一條街，先去求診；更有人完全行唔到，加睇厭咗醫生，就會「斷定無得醫」，得出「人生會老，老咗一定要病」嘅歪理。又例如，有人兩三日（大便解唔順，就會自行處理，增加纖維，清水攝入，甚至運動，中藥介入；但又有人長年累月都係一週解一次，覺得自己好正常唔需要處理。
返黎主題，好嘅飲食習慣，就係朝早食得好，中午食得夠，夜晚食得少，具體飲食攝取就係跟「每日飲食指南」，蛋白類、醣類、維他命、脂類、礦物質、水等等「必需營養素」係維持生命所需，都要攝入。
門診遇到好多病人被要求戒口戒得好清，清到生果兩三年唔俾食，魚肉又唔食，基本上就係用中藥、米飯同菜心維持生命，《黃帝內經》已經講明，毒藥（即係中藥）拎黎醫病，補益身體係靠綜合營養（五穀、五果、五畜、五菜）。但現代係有一個大嘅中醫流派，剩係叫人食米飯，生果要完全戒斷，菜都完全唔可以食，要食只能食菜心，肉就基本上都唔食得，聲稱可以醫病。
亦都有一個大嘅西方派別係「斷食」，並追求「水斷食」，即係話連續最少三日、五日、七日甚至更長時間唔進食，逼使身體進入饑荒嘅狀態，而誘發身體應激反應，最終結果希望身體得到自我修復。關於斷食，已經分享過輕斷食安全有效，水斷食隨住時間加長危險程度會增加，唔再寫長篇喇，網上文章可以搵到兩種極端，各有其支持理據。
簡單講，講科學，血液=血漿+血球，血漿包含水、蛋白、糖、脂質、離子如鈉、氯、激素等，紅血球含血紅蛋白、含鐵基質，需要維B（如9及12)，維C維持，而血漿銅藍蛋白參與鐵代謝。菜心會有葉酸、維C，就灼熟過程會流失+熱破壞咗好多，白飯有蛋白，一碗飯大概有5至8克蛋白，60公斤體重只靠白飯補蛋白，起碼每日要食10碗飯，當中仍然缺乏離胺酸和蘇胺酸兩種必需胺基酸，唔講脂質、無機鹽、礦物質等，唔止完全唔夠，可以講仲爭好遠。水斷食就更加無營養可言，係靠身體自生自滅或額外服食營養素去維持。黎得門診已經有頭暈、胃痛、便秘、失眠、關節痛等等症狀，唔補好飲食營養，點可能醫得好？所以歐陽醫生嘅門診係以正常營養均衡飲食之下作中醫治療，中醫治療包括中藥、針灸、整脊、推拿、導引等方法。
Comments