中風
冬春交界，11月至翌年2月係腦中風嘅高發時間，當然一年四季都會發生，所以，任何時候都要注意。
中風，主要分為腦缺血同腦出血，缺血係血栓、梗塞引起，出血係血管破裂。
高危族群係糖尿病、高血壓、高血脂、腦血管畸型、心房顫動、低運動人士、飲酒過量人士等。
西醫科普相信大家都熟識，今日想講下中醫科普。
1。安宮牛黃丸，
中醫有「涼開三寶」，即安宮牛黃丸、紫雪和至寶丹，主要功效係清熱開竅，開竅意思係指暈咗救返醒，所以係俾昏迷嘅人口服，食唔到嘅就由鼻灌入服用。而平時食安宮牛黃丸保健嘅係廣告嘅教學，絕對唔係傳統中醫留落黎嘅教學，再者，原藥真品瀕危無得用，都係以人工製品或替代品入藥為主。清醒、可自由活動、進食嘅人想清熱有好多方法，唔需要食到咁貴，再者，保健唔係每日經常食用根本唔算得上係保健，換個例子，抗生素可以發炎時醫細菌感染，咁你會唔會拎抗生素每日服用，或者，一年每季食一次抗生素去做保健呢？答案係否定嘅，用安宮牛黃丸保健道理亦然。
2。放血，
的確，就黎中風嗰刻放血係顯效嘅，但一般巿民有乜機會會掌握倒嗰個時機呢？家人中風，第一時間係叫白車上醫院，而唔係放血。而刺絡放血，唔係十宣呢個穴位，其實仲有更多常用顯效穴，如果想做刺絡放血保健，可以揀身體有麻、痹、頭脹痛等不適症狀嘅時候搵中醫幫你針，唔好等到中風後唔知會唔會家人亂針，刺絡後嘅感覺係好顯著嘅。
3。救命水，
我門診都有教過，唔記得點做嘅記得問返我，簡單易行，最緊要係持之以恒。
4。通暢氣血，
想預防中風，最珍貴在乎平時保養，中藥同針灸都可以幫到手，有乜唔明就咨詢返你最信任嘅中醫。
5。中風後處理越早越好，
中風後建議及早做針推，最好係出院就即刻做，每日做，我見過及時治療嘅康復好理想，亦見過啲中咗風超過三個月都唔睇醫生就咁掉喺屋企瞓嘅病人。過咗三個月先去醫，療效真心差好多，機會仲有嘅，係3-6個月療效比3個月內差，半年後甚至一年後好難康復喇，嗰陣再搵中醫，以保健為主，唔好太期待會得到有效嘅康復。
Comments