反射痛
早段時間幫團體做義診，發現大家對反射痛有好深嘅誤解，網絡上嘅教學一般係咁：呢度痛、嗰度度往往係好嚴重嘅疾病，一般人會以為普通嘢而誤診，如 https://heho.com.tw/archives/1115 所示。歐陽醫生想表達嘅係，呢種類型嘅資訊其實更適合醫療人士睇，因為醫生識做排除診斷，最少知道理化檢查做乜、體格檢查又要做啲乜。
連普通病都未排除開黎，就去諗疑難病，其實係一種焦慮。
團體中人，普遍都有肌肉骨骼病、消化系統病同營養不良。佢地不斷表述下背痛係胃病（錯）、肋痛係胃痛（錯），歐陽醫生逐一糾正，亦逐一處理痛症，胃痛多數真係胃嗰度痛，背痛真係多數係背脊肌肉痛。
肌肉骨骼痛，針灸及整脊復位就顯效，治療完唔會即日再痛；
內臟痛，針灸期間可以鎮痛，但拔針後可能即時再痛，而內臟痛往往係痛到動彈不能、直冒冷汗、打針都唔止痛，例如膽囊炎、胃穿孔等引起板狀腹、腎石引起腎絞痛之類。
排除焦慮，就要先由普通病著手，如咽痛通常係胃酸反流、咽炎、頸椎病等引起；中腹痛係胃痛；右上腹痛係膽囊；右下腹痛係闌尾；胸背連痛可能係心臟，但都有見肋間痛、肌肉痛。
「胰臟痛則是背部隱隱作痛，或從胸部、背部一直作痛，背部要彎曲才感到舒服一點。
尋日病人問起「腰痛即係腎痛要想要去照吓」，歐陽醫生答，結石絞痛係痛到無辦法郁、唔會自行緩解、打針都唔止痛，疼痛翌日可以自己行黎門診就肯定唔係腎絞痛，歐陽醫生用咗針灸同手法處理完，痛就減咗7成、即是話，又係普通肌骨痛。
咩時候要進一步檢查，係普通門診排查後，療效唔理想，先要考慮到其他疑難病。
請拒絕疾病焦慮！
後話：網絡資訊多，錯誤資訊更多，因為社會需要流量，流量等於金錢，所以大家都為咗搵錢製作大量嘩眾取寵嘅文章、甚至短片，而短到至10秒至30秒係最受歡迎嘅，但大量錯誤資訊都係源自於快而短嘅資訊，正確資訊沈悶，長文無人鍾意睇，亦唔會被轉發，搵唔倒錢，但沈悶長文係有必要存在。歐陽醫生都好鍾意引用網絡資訊，好嘅唔好嘅都會引用，結合臨床經驗歸納。
內行人先分析倒真偽，即係話視光師一眼就睇出鏡片係散光鏡、近視鏡、漸變鏡；整車師傅耳仔就聽得出車聲有何不妥；醫生，特定專業先會分倒相關資訊真偽。
2018年起寫醫學博文至今6年，會繼續堅持寫作，但門診關係，太繁忙嘅時候就唔得閒寫太多，「盡量保持醫學質量之餘又簡而言之」係寫作目標。
コメント