對症處理
退燒：
新冠打過疫苗嘅一般都會燒到39.5-41.5，
高燒需要食退燒藥，政府抗疫包有配備paracetamol 500mg，有唔明問相熟醫生或睇抗疫資訊https://www.ssm.gov.mo/apps1/PreventCOVID-19/ch.aspx#clg22916。
發燒高到42度一定要搵醫生查詢點處理！！！
退熱貼、冰敷額頭都係傳統嘅物理降溫法，38.5度以上都適用，一個月內新生兒唔適合用。
小兒推拿，適合3歲或以下幼兒，手法用推天河水、清肺經等。
精油都可以退燒，尤加利、薰衣草、薄荷、牛至油等等，按摩油稀釋後按摩胸背部，注意蠶豆症、2歲以下幼兒唔用薄荷。
中醫仲可以用刮痧、放血手段輔助退燒。
溫水拭浴比較適合低燒低過38.5病人。
——————————————————————
口乾：
可以將水果切片泡熱茶代水，焗茶推薦用雜果，2-3種水果更好味，如雪梨、蘋果、橙、檸檬、菠蘿均可，平時食生果易有過敏咳嗽嘅人士可以加適量生薑、陳皮。
亦可以煲雪梨南北杏雪耳茶、竹蔗馬蹄紅蘿蔔等等。
發燒口乾咽痛，退燒會發大汗及多飲水利小便，需要飲足夠水份，但新冠嗰種厚膩脷苔係飲清水都見苦，適量代茶可以有效舒緩不適。
乜都唔想煲，就簡單買電解質水，但要注意用量，常見保礦力一份量係200毫升，女性可以飲兩份，男性可以飲三份，注意過量飲用會增加身體負擔，而且，飲用需要小量多次，可以每15-20分鐘飲兩啖，大枝裝倒出黎用細杯飲用更衛生。
中醫可以用中藥桑葉、蘇葉、枇杷葉、沙參等等，問返中醫幫你對證處理。
——————————————————————
要減輕症狀，最理想係做好個人防護，少聚餐，戴口罩，勤洗手直至發展到第三四波之後。
好多人話洗鼻𠺘口無用，要注意洗鼻𠺘口嘅目的唔係消毒或殺菌，因為真係無消毒殺菌作用，主要目的係沖走病源，同洗手同樣道理，勤力沖洗鼻咽，只係為咗減低病毒殘留喺黐膜嘅數量，洗鼻一定要用無刺激性嘅生理鹽水，𠺘口用普通漱口水就可以了。
——————————————————————
嗰啲向你推銷產品嘅人，敬請留意小心，睇返佢真係想幫你，定係單純想搵你錢，因為，上述對症處理方法都好便宜，只係需要幾蚊至幾十蚊。
再者，臨床觀察起黎，有接種過疫苗嘅病人病程都短，高燒1-2日左右，全過程3-5日處理好，使用中藥係身為中醫嘅我推介使用，國內、台灣、國外都有實例，當然唔信中醫都唔緊要，只食西藥病程都係5-7日左右，可能會繼發咳嗽、疲累等，病癒後再慢慢處理。
——————————————————————
Comments