穴位按摩

我一向好少介紹，做唔啱其實無乜效⋯嗰啲內容農場，參考下好喇，理論太強，實用性太低。

歐陽醫生慣常係點做？必須針對唔同疾病性質去做（我知我用緊個肺黎講嘢，但係唔咁做確實收效差）。

例如，做全身運動（伸展及出微汗），配合經絡或穴位拍打（焗部起痧或皮膚潮紅），對神經症狀即酸麻痛有效，頸腰椎病引起如手麻、坐骨神經痛有效，可以加按相關穴位，如曲池、手三里、勞宮、內關、陽棱泉、足三里、三陰交等等。

例如，頭痛，針對頸部牽引、伸展及米字操，再按肩井、風池、風府、角孫、耳門、聽宮、聽會、顱息、翳風、太陽、攢竹、曲池、合谷、中渚等。配合刮痧或油推手肘小腸經、斜方肌。

例如，胃脹便秘等，推腹部，打圈順逆時針都做，必須用力按夠一定深度，至皮膚必須潮紅，直至聽到腸鳴、放屁或噯氣。

例如，失眠，主要推陰經，即內側經絡，配合打坐，腹式呼吸，有跟過我門診應該都有學過咩係睡前功。

例如感冒，推肺、大腸經，再按風池、肩井、迎香等。

推嘅同時，我一般用油，可以用中藥藥油，細細個就有用豆蔻油，缺點係每款都太大枝，而且中國香水味唔係個個頂得住；臨床我認為用歐洲藥油（精油）更方便，因為每枝細細，香氣比較易接受，涼嘅幾款、熱嘅幾款已經好夠用，我自己都係備住十零枝去配用，例如備啲薄菏、蘿蔔籽、迷迭香、鼠尾草、薰衣草、薑、廣藿香、當歸等等，真係好易用而且效果好好。（一定要用真草本，人造香精有致癌性！唔好亂用）

#穴位按摩 #刮痧 #頸椎病 #坐骨神經痛 #便秘 #胃脹 #頭痛 #精油 #中醫 #澳門