體質偏好

嶺南人體質多濕熱，係天氣、水土問題。

傳統嘅濕，同好食魚鮮有關，當然與靠海亦相關。

熱，唔洗講，氣溫真係好高。

賭業盛行，多咗人24小時輪班工作，長期夜眠不佳，會引起陰虛、血虛嘅狀態，當中，某部份嘅「虛」，其實瞓返好、瞓得夠就可以補返起黎，所以，因輪夜更為主嘅人群主力要調好睡眠質量，而唔係濫補。

事實上，好多人習慣自行服用安眠藥（抗焦慮藥物），亦有唔少人自行買營養素如褪黑激素以助眠。

呢度特別寫一下褪黑激素，褪黑激素其實唔係必須營養素，人體松果體會自行產生褪黑激素，當長期額外補充褪黑激素，松果體反而會被抑制，減少分泌或不再分泌褪黑激素，引起更嚴重嘅生理問題。當然，呢個年代網購容易而且盛行，安全使用合格營養素變得困難，習慣自行網購補充劑嘅朋友，懇請你地三思而後行，整亂咗身體，更難調回正常，尤其係長年使用激素類嘅人群，就算要交俾中醫處理，都必定係惡搞同棘手嘅問題。

另外，門診有見氣虛嘅問題，同運動過度、營養不足、情緒或壓力等相關。

而寒、瘀血等問題，會見與運動不足、好食生冷相關。

臨床所見體質千變萬化，針對同一種疾病，往往用上好多唔同嘅治療方法，就係中醫特別提倡嘅「同病異治」。中醫其實唔難用，所用嘅方法只係幾棵草藥、幾枝針或者一根指頭、一塊掌肉，最難嘅地方，係在於點樣分析正確，斷好疾病、證型。