損傷與修復

病人都有個迷思，點解明明無做過啲咩特別，但係會受傷。

急性損傷，係人都明，如跌、挫、扭、碰傷。

慢性損傷，俗稱叫勞損，係由重複性動作、骨關節錯縫、韌帶老化、筋膜繃緊等引起。

兩者都會引起身體炎症，但消炎止痛藥，只對急性損傷有效，慢性損傷，需要補充營養素。中藥，不論外敷內服，會針對急慢性不同配以唔同藥物組合。

治療，方法有好多，針刺（刺絡放血、針刀或刃針、體針、電針等）、艾灸、熱療（特定電磁波、超聲波、場效應等）、推拿、正⻣整脊、運動伸展（或處方訓練）、肌肉效貼等等，仲有其他，如火針、衝擊波⋯

歐陽醫生都坦白自己都有周身傷，自行處理，一般先做伸展、正骨，酸痛會用筋膜槍，熱療後伸展效果更佳，超聲波都係一個唔錯選擇（家用版本無醫用版咁強勁，但基本細關節夠用，個人認為最緊要係手法），刺痛會用刮痧棒，最後手段就會落針。

病人又有一個問題，已經成日做拉伸，點解都係唔得，歐陽醫生答，拉伸唔係唔得，只係唔夠，醫生門診都要用咁多種方法黎做治療，處理損傷唔係咁容易，要有啲技巧。

又有一個常見問題，已經做過針灸，點解唔得，都係嗰句，針灸唔係唔得，只係唔夠，針灸以外要配合治療先會快，唔配合治療唔會斷尾。

Recent Posts