病重藥重，病輕藥輕，無病無藥

好記得之前教月子班嘅食療同痛症，有學生嫌棄歐陽醫生寫嘅食譜太「cheap」無寫中藥喺入面，可以理解，學生學月子，就係想學識點用藥。所以我帶出，想學識用藥，甚至普通食物，先分清佢嘅歸屬四氣五味，識就用自己嘅脷去感受，唔識就上網查，搜「食物名」+「性味」二字。

係如菠蘿、芒果，民間覺得佢地「濕熱」，但其實佢地係性平，味甘酸，芒果唔熱反而仲稍稍偏涼㖭，「濕」係佢地嘅益處，養陰止渴，對口乾咽痛有一定療效，「熱」係身體對佢地過敏或唔適應，產生發炎反應，好嘅身體食完芒果菠蘿其實唔會唔舒服，或者講，健康嘅腸胃進食一般食物唔會產生不適。

用藥前，先學識用食物，如果基礎食物都用得唔好，歐陽醫生唔敢教你地用藥，所以要體恤歐陽醫生筆下教材唔肯寫出藥性強嘅食譜，藥性唔強就唔會食錯，唔會整亂個身體。

中醫對飲食係高度重視，而肉類更係養虛中佔重要地位。「脾」（指消化系統）係「後天之本」，人體離開母體後乜都靠腸胃消化吸收代謝。四氣五味好重要，用啱可以養身可以醫病，營養均衡好重要，見《素問·臟氣法時論》。肉類好重要，體虛嘅人剩係草本係爭啲，加埋肉類就可完美補益，見《臨證指南醫案·虛勞》。

————————————————————————————————————

附文：

《素問·臟氣法時論》「毒藥攻邪，五穀為養，五果為助，五畜為益，五菜為充。氣味合而服之，以補精益氣。此五者，有辛、酸、甘、苦、咸，各有所利，或散、或收、或緩、或急、或堅或軟，四時五臟，病隨五味所宜也。」

《臨證指南醫案·虛勞》「夫精血皆有形，以草木無情之物為補益，聲氣必不相應……血肉有情，栽培身內之精血……多用自有益。」

——————————————————————————————

引伸出，係咪食咗中藥就等於養生呢？

用中藥黎養生，最大益處係藥商，可以使人有病無病都用藥，一年四季唔間斷用藥，藥價就可以飆升。

以前一年無一次肉食，所以要煲當歸黑豆，當歸可以刺激骨髓、造血細胞，含雌激素成分，黑豆蛋白當肉類，的確無肉食嘅環境下係好嘅進補方式。素食者、無乳腺增生、無子宮肌瘤，又有血虛嘅情況，可以咁樣補，但一定要搵出血虛嘅起病原因。水喉漏水，都會換膠塞換個新，唔會就咁搵個桶接住啲水，要交水費、會越漏會越多。長期貧血，唔會擔心去排除消化道出血或者癌症腫瘤之類，會剩係一味煲當歸補血嗎？

唔係話用藥唔好，用藥係好，中藥真係好見效，前提係要用得啱，中藥真係好容易用錯，用得好係要技巧、要知識、要經驗。

門診嘅非正式統計，唔飲藥材湯嘅老人家比經常煲藥材湯嘅老人家健康太多了。歐陽醫生自小體弱，成長期老媽子有亂煲藥湯，身體無好過，但成年後禁咗家中亂煲藥湯，全家身體都健康咗。

有病就直接用藥，「病重藥重，病輕藥輕，無病無藥」，係醫生自己保健嘅用藥方式。

———————————————

#新聞

#中藥使用

#性味

#網上搜尋

#自我學習

#食療

#四氣五味

#正確用藥

#病重藥重

#病輕藥輕

#無病無藥

#澳門中醫

#澳門女中醫

#中藥代煎