文職工作經常有頸肩腰痛問題，只要工作，就有機會勞損，無得避免，唔少人都習慣去按摩中心舒緩肌肉疼痛，但需要注意，如果習慣依賴每星期按摩先可以將疼痛緩解，唔去唔得嘅時候，就要提防身體有否受損。
肌肉之所以勞損受傷，主要由肌肉協調失衡引起，正常人體脊柱有一定曲度，叫生理弧度，生理弧度過曲度過少變直，都會產生急慢性痛症。好地地人嘅骨頭點解會歪咗？原因不外乎係不良生活姿勢，日積月累錯誤軟組織拉力，會將骨頭拉到輕錯位，長久以黎就會引起富貴包、陀背（或叫寒背）、肩內旋或肱骨前移、骨盆前傾、小腹增大之類嘅形態，輕者只係肌肉繃緊不適，重者可見頭暈、胸悶氣短、手或腿麻痹、坐骨神經痛、容易瞓捩頸（落枕）等。
自我保健方法係，維持正確坐姿（如附圖），工作每日最少8小時，佔生活比重好大，維持正確姿勢有效減少痛症復發。
但已經勞損嘅人會發現，無法維持良好姿勢，一定坐得唔好，坐到似蛇似鱔似貴妃先覺得舒服，呢個時候，就要加強肌力，舒緩繃緊，即係將緊嘅肌肉放鬆，鬆嘅肌肉練返有力，將肌肉放鬆係最容易做到，拉筋伸展、針灸、推拿按摩、拔罐均可，將鬆弛嘅軟組織變返有彈性相對困難，需要補充蛋白質、補充鈣、鎂、鋅、Vit B、D、適量碳水化合物，修復韌帶需要另加鉀、鐵、銅、Vit A、C、甚至輔酶Q10等，（一句到尾就係均衡飲食，食唔黎唯有補充劑，要食由食物提取嘅），再加肌力、重力訓練方可成事。
骨頭嘅錯位，就要配合正骨、整脊等手法。當做齊以上，你會發現，唔坐正確姿勢反而會覺得唔舒服。
中醫嘅方法，有針灸、推拿、整脊，運動方式有打坐、氣功、八段錦，以及其他武術例如太極、各家拳法等。中藥方面，急性損傷通常見濕熱、瘀熱、鬰結等證型，慢性損傷通常見肝腎陰虛、氣血兩虛等證型。發作期唔用湯水，唔夠力，直接煲中藥茶飲。
緩解期，可以蒸肉汁（瘦肉攪碎腌好蒸湯）、煲番茄薯仔瘦肉湯、貝殼海鮮湯、羅宋湯等等，湯渣唔食，要補身想要食肉就另外再煮一份無煲過湯嘅肉。
打蔬果汁飲，蔬菜＋水果，糖分唔會太高，七色蔬果都要食都，自行搵搵食譜，包羅萬有，例如：（青瓜、紅蘿蔔、番茄、西芹）、（蘋果、菠蘿、香蕉、牛油果）、（紅蘿蔔、橙、檸檬）、（青瓜、雪梨、牛油果）等等，可以根據口味適當加糖、薑汁、辣椒粉等調味，蔬果汁唔可以取代原型食物，但要補身就要打汁棄纖維先可以飲多一兩份蔬果又唔會太飽。
Comments