風濕骨痛
近日天氣，瞬間變到春天嘅感覺，有沒有？
反正近日病人反映出黎，就係有！
風濕骨痛，係一種夜間特別痛，似係刀仔刮骨、蟻蟻爬肉嘅不適感，翻風落雨前兩日就會出現，直至落雨嗰日就減嘅症狀。
中醫講就係同舊患相關，有過傷患無處理好嘅舊患，亦同氣血虛弱或瘀滯相關，多見與年齡相關，只係因為多數年紀大嘅人群，氣血運行相對較差，再者所儲嘅舊傷患亦較多，唔等於年輕人沒有，亦唔等於年長者必定有，只要 閣下嘅氣足血旺，就唔會有風濕骨痛嘅發生。
要養氣血先要養好脾胃，即係要營養均衡、飲食定時、適當飢飽，湯水好簡單，養脾胃嘅湯水可以係：蕃茄薯仔紅蘿蔔瘦肉湯、瘦肉片（魚、豬、牛均可）滾豆腐、芫茜、洋蔥等三滾湯、無花果粟子瘦肉湯、雪梨沙參南北杏陳皮湯等等，清潤、老少咸宜嘅食材湯就可以好好咁養好脾胃了，脾胃好，氣血就生。
氣滯血瘀點搞？可以做硬氣功、帶氧運動如拳擊操、快速呼吸等等方法，保持情緒舒暢，適當出汗，活動完係要令身體保持溫暖，情緒快慰有種清爽嘅感覺就有效了。
自我望診檢查係，雙眼有神，面色紅潤帶光澤，唇色指甲粉紅，舌體呈淡粉紅，脷苔薄白滋潤。
Comments