中藥與2019新型冠狀病毒肺炎
中醫一直好努力喺疫情裏面出力。
我係一個臨床中醫生，但係呢排真係無乜寫過任何中醫中藥post，主因係，我唔係做一線重症醫院嘅，無真實接觸確診病人，何得何能？
但，大眾真係對抗疫與中藥預防好感興趣，令我不得不寫幾句：
公元前二百年，即係二千幾年前，中醫嘅經典書籍《內經•素問•藏氣法時論》有講過：「五谷為養、五果為助、五畜為益、 五菜為充」，係教人點樣飲食均衡，當然，仲有叫人做運動，如《異法方宜論》、《奇病論》所述；而亦有講人點解會病，如《內經•靈樞•五味論》、《百病始生》等有講。
即是話，講黎講去都係叫人均衡飲食、作息定時、運動結合、心情舒暢等等。俗啲講句係質量好嘅三得（食得、瞓得、疴得）。
如果 閣下嘅身體係：膚色微黃（黃種人呀，一定係黃皮膚），內透粉紅、面帶光澤，即係「常色」，舌象係「淡紅舌、薄白苔」，略濕潤，嘅正常脷色、脷質同脷苔，胃口、大小二便、睡眠都好，唔洗搵藥食，已經好好。
但，如果閣下做唔到以上，煲下保健茶甚則中藥，不妨去做，甚至係絕對有需要。或者食下食物源提取嘅營養素，都無妨。
今次2019新型冠狀病毒引起嘅疾病（或叫疫症、疫病），各篇文章都歸納得好好，（臨床一線脷苔圖我都有睇過），主證就係：「濕、濁、熱、毒、瘀」，重症病人有夾「虛」，所以，用藥就針對以上就得喇。
好多朋友都有發保健茶俾我睇，問我，我一律答「根據體質去揀唔同嘅保健方」。
網上流傳嘅處方都有補氣藥、都有清熱解毒藥、都有袪濕藥，你諗下，醫生、護士，24個鐘不停輪班、勞累、工作，無運動只有勞動，一定唔夠休息唔夠氣、梗係要補氣啦；捱夜、伙食差、日日對住啲病人同病毒，梗係要清熱解毒啦，所以處方真係好適合佢地飲用。
但，你諗下，唔洗輪班嘅你，日日瞓夠又做下運動又年輕又貌美，有至於要用北耆日補夜補氣嗎？而，輪班工作嘅你，長期無辦法養血養陰，陰血虧虛嚴重，有至於用蒼術嗎？唔考慮改用白術嗎？捱夜、喉嚨痛嗰三錢仔清熱解毒藥，夠力嗎？
我真係唔反對人用中藥，但前提請務必用啱，17號開始已經有好多行家開咗門，而且，休診期間我地好多同業都無停過線上咨詢，想飲藥保健，影條脷苔或者去門診傾下問下啦，真係唔難。
Comments