病毒性呼吸道疾病橫行－與抽水文之簡釋：
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
病毒橫行，好多人病，症狀有發燒、咳、吐痰、打乞嗤等等，於是乎，一大堆抗病毒商業抽水文就出曬黎，平時都有，但無呢排咁狼。
呢篇文章唔係要阻人搵食，我成日都講阻人搵食猶如殺人父母，請大家千祈唔好誤解我先。
但，作為消費者嘅，理智消費會好啲，試諗下做打工仔搵錢咁辛苦，拎去做信仰奉獻都話叫值得吖，拎出買啲以為有效實際無效兼cap水嘅商品，確實又真係…搞到我想寫篇post。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
賣口罩、紙巾、酒精、洗手液、消毒水嘅無問題，常規醫療都要咁做，按返正常情序保護好自己就啱嘎喇。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
而賣所謂「天然嘢」，絕無「化學嘢」嗰啲文章，我就呼籲 閣下小心閱讀或收看喇。
點解？
咩叫「天然嘢」？天然物質嘅化學結構複雜過人工化學物質萬千個倍，唔信你查一下食油嘅分子鏈有幾長先，或者查下唔同地區嘅岩鹽、海鹽嘅附加物質有幾多種同埋有幾唔同。
咩叫「化學嘢」？每日飲用嘅水，都有化學分子式，H2O，即是兩個氫離子一個氧離子，呼吸嘅空氣，都有唔同分子喺入面。化學，係一門研究物質嘅學科，點解要驚化學嘢？化學係文明社會必須有嘅知識。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
精油普遍存在於植物的各個部位，成份是有機化合物，即複雜的芳香族。精油嘅化學結構，有醇、醛、酮、酯等等。
因為植物本身有自我抗病能力，古代中華人就摘黎煲水、榨汁、磨粉等，即係依家嘅中草藥。古歐洲、印度人，就摘黎蒸餾，即係變咗依家嘅精油、花水。其實無錯嘎，植物藥真係好用嘎，所以西方醫學拎咗植物提純，單提主要有效成份，平時幫襯西醫開嘅咳藥水，唔好以為唔係植物藥呀，你查返植物學名就知道其實本質係黎自陳皮、遠志、葱等等。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
我支持植物用藥，但問題係在於點樣用，以中醫為例，如果真係熱咳、用熱藥，肯定加重病情，同樣地，用西藥植物提取、用精油都一樣，要用啱先有用。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
嗰啲話放喺度擴香，就可以殺曬全屋病毒嘅，又或者搵啲油噴下滴下就殺菌殺病毒，唔洗問阿貴，都知係呃人嘎卦？
要殺病毒，有幾點，第一，要搵返邊隻油針對殺邊隻病毒，我查論文唔多覺有「殺」病毒嘅文章，只搵倒「抑制」病毒嘅文章；第二，要針對返邊隻油對應邊種病毒，例如，抑制禽流感，人地配咗隻叫QR448做科研，你無配返相同比例同成份嘅油，就未必有效對應流感病毒；第三，科研係直接用於健康生物嘅表面，或者直接作用於病毒本身，患咗病再用，通常都無效；第四，要睇返點樣為之有效方法，要計算成份、濃度、有效率、起效時間、有效時間等等。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
至於緩解症狀嘅植物配方，有好多，自學或者黎我門診一齊研究下都得，我間中都有開下俾病人用。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
簡單一篇論文做例子：
病毒吸附後通過添加香精油未觀察到病毒抑製作用。 精油的抑製作用似乎導致直接病毒滅活，然後再吸附在宿主細胞上。
No viral inhibitory effect was observed by addition of the essential oil after virus adsorption. The inhibitory effect of the essential oil seems to cause direct virus inactivation before adsorption on host cell.
(http://dx.doi.org/10.1590/S0074-02762010000300010 )
其實，喜歡嘅，自行搜尋，你知，呢個網絡年代，搜尋引擎係幾咁強大。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Comentários