豆與蛋白質

豆與蛋白質

睇過歐陽醫生門診，都知道歐陽醫生高度重視營養食療，有云：「藥補不如食補」，腸胃狀態好，人生三得（食得、瞓得、疴得），其實病痛真心少，咁又洗乜食咁多中藥呢？

食得，係指食得均衡，唔係單純指食飽，飲廢水、食fast food或腸仔餐肉一丁，餐餐都飽但絕對唔健康，更甚講係有致病性或致癌性。

同學生傾計，發現，大家對蛋白質嘅概念唔多理解，所以，今日要講下豆同蛋白質。

豆嘅種類，可以分為1-蛋白豆，2-澱粉豆，3-纖維豆。

1-蛋白質類的豆：黃豆、黑豆、毛豆、黃豆製品（如豆腐、豆干、豆漿）等。簡單記憶係平時做豆漿嘅豆。

2-澱粉類的豆：紅豆、綠豆、花豆、皇帝豆、豌豆仁（青豆仁）等。簡單記憶係拎黎煲糖水嘅豆。

3-纖維類的豆：如四季豆、豌豆莢、豆角、綠豆芽、黃豆芽等。簡單記憶係炒餸炒肉片用嘅豆。

平時指用豆取代肉，係指用蛋白豆，至於，豆蛋白可否完全取代肉類，答案係否定嘅，植物蛋白吸收率好低，咁係咪單純食動物蛋白呢？答案又係否定嘅。最好嘅蛋白質吸收，係指綜合蛋白，即豆類、肉類、雞蛋、乳（清）類、米類蛋白都食啲，就係最好吸收蛋白質嘅方法。

而豆蛋白，只有豌豆蛋白屬於完全蛋白，完全蛋白嘅意思係胺基酸種類較豐富與完整，豌豆即超巿凍櫃可見嘅包裝青豆，係完全蛋白，但屬於澱粉豆，蛋白含量比例並唔高。

Recent Posts