濕

點解會濕？

睇過中醫嘅朋友，應該會聽到中醫成日話啲病人「濕」，究竟，「濕」到底係乜嘢一回事？

「濕」，故名思義係指水液相關嘅物質，「濕」多數係病態時嘅形容詞，人體構造本來就係有水份、有體液，當呢啲人體嘅水液物質運作正常，就唔會有濕嘅產生，不過，嶺南、沿海地區，因為天氣、水土、飲食文化嘅問題，會影響身體，容易形成病態嘅「濕」。

「濕」嘅產生，中醫歸納喺「脾、胃」運化得唔好、「腎、膀胱」代謝得唔好、「肺、衛表」出咗問題、甚至係「三焦」有事引起，外界環境就係「濕邪」引起。

當然，有病梗係可以搵中醫開方藥，但，自己都要注意保健。要「化濕」或「袪濕」，首要係做運動，要適當排汗；其次，飲清水要足夠，俾腎臟濾過正常，膀胱正常儲尿排尿。再者，就講戒口，戒酒，酒類生濕，酒精最終分解產物係二氧化碳同水，酒精分解前，對腸胃粘膜有一定刺激性，中醫指傷及脾胃都會製造濕；另外，就係戒甜食、甜飲，甜類飲食，西醫嘅道理係會影響身體致慢性發炎，中醫嘅道理係阻礙脾胃運動產生痰濕阻滯。

食療，會建議瓜類，例如，食西瓜、煲冬瓜水、絲瓜湯，亦可以煲粟米鬚水，以上主要利水；或者以健脾為主，例如淮山，炒肉片或者煲淮山湯，而粟米薯仔紅蘿蔔湯、蕃茄肉片湯都可以。

#濕

#濕氣

#化濕

#袪濕

#中醫

#推介

#方法

#澳門中醫

#網路圖片