中藥配伍
門診病人肯交俾醫生全權處理處方+煲藥嘅，一般對醫生嘅信賴度較高。
強烈要求自己煲藥嘅，多數考慮藥物質量、煲藥質量或收費合理程度。
鍾意攞住紙質處方嘅，保險理賠原因以外，就係要檢查醫生嘅用藥。
試過有病人拎藥單執完藥，請藥師另外抽起病人自己唔鍾意飲嘅藥材，剩返先拎去煲，唔係講笑，真係有病人將啲參執走先再煲劑藥，其實咁樣會破壞咗醫生嘅藥物配伍。
講到破壞處方完整性，又試過有啲病人自己煲藥材湯，屬性係同處方嘅中藥相反嘅。例如醫生處方緊袪濕茶，病人自己煲養陰湯；又例如醫生處方清熱解毒藥，病人自己煲補湯。
中藥嘅配伍，坦白歐陽醫生門診時好懶去解析，具體原因係解析唔黎，中藥有對症用藥、有對病用藥、又有對證用藥，另外，相須、相使、相惡、相畏用藥，又有引經藥，除咗古方經典用藥外，更有根據現代藥理、生理病理黎用藥。
如果，病人係熟曬生理、病理、生物化學、方劑、古典如傷寒、溫病、肘後方、金匱之類、或者現代藥理meta分析，真係好歡迎到門診同歐陽醫生探討交流，相信醫生可以喺當中學習同參考。「三人行，必有我師焉。 擇其善者而從之，其不善者而改之。」歐陽醫生長年累月都在學習中（近年睇meta睇到頭痛中🥲🥲🥲）。
留言