冬末春初，黎緊一連幾日有雨，溫暖潮濕，但又乍暖還寒，所要注意養生。
————————————————————
早晚要有薄外套，體虛人士最好用薄絲巾維持頸部溫暖。
湯水方面，體寒者仍要注意補氣助陽，濕重者可以利水但切勿寒利太過。
————————————————————
要袪濕，一定要運動排汗，懶郁嘅人，焗下桑拿排汗無話唔得，但要知道效果完全唔一樣。
天氣再濕啲，可以開抽濕機，意思係濕度相宜人體會覺得舒適啲，唔好搞錯，唔會抽到身體聚嘅濕。
點解身體會聚濕？主要講人體水液代謝失常，排汗太少、飲水太少、排尿太少、運動太少。
引起水腫嘅中醫術語係，脾虛濕阻、三焦失司、腎陽虛衰、風水相搏、濕毒浸淫等。
————————————————————
至於淋巴會唔會塞咗，試諗下，腦血管塞咗會中風偏癱，心血管塞咗可能心梗致死，淋巴會唔會無啦啦塞咗先？
淋巴好少講阻塞，但多數講淋巴水腫，一般係乳癌術後切走咗淋巴，單邊上肢水腫，或者係寄生蟲，如血絲蟲，游咗入淋巴管塞住咗，或者嚴重、長年高血壓，癌症電療，燒傷引起等等，亦有先天疾病原因，檢查可以見到淋巴扭曲、擴張等。
————————————————————
湯水，例如1-冬瓜湯，可以配薑、酒、胡椒、排骨；可以配鹹蛋、蝦米、瑤柱、肉碎等等，適合需要清嘅朋友。2-粟子湯，可以配合桃、腰果、竹芋、瘦肉；可以配紅蘿蔔、馬蹄、粟米、淮山、芡實；可以配連藕、赤小豆、白扁豆、薏米等等，需要潤、需要清，跟返身體所需選擇配搭嘅食材。3-或者簡單啲，可以煲淮山、薏米、芡實、茯苓粥，可以加瘦肉、陳腎，記得要加薑、陳皮，亦可以加啲麥芽令個粥無咁滯。
————————————————————
コメント