食療嘅重要性

門診病人都喜歡問要戒咩口、煲乜湯。

臨床經驗所得，真係無辦法去教病人煲藥材湯，因為隨訪病人，大多數煲兩煲就會亂曬大籠。

要去學煲湯，尤其係藥材湯，一定要具有基本中醫常識，否則，好容易整亂身體。

簡單講，正氣好夠煲黨參北耆水、濕熱嘅狂飲涼茶或者誤飲養陰嘅湯水，臨床常見到不得了，當病人每日無事都煲三五錢參，甚至每日食一錢人參嘅時候，氣虛時，你期待中醫生開幾錢參先夠用？可能要用到一両。咁，到年老大虛時，要用幾多両先有用？

經常煲藥材湯水，會令臨床醫生無辦法醫好病，或者令臨床醫病更棘手，即病程更長。

但，要補身點算好？首先必須針對飲食營養均衡！！！而湯水，用食材煲嘅湯水，最。安。全！例如雜菜薯蓉湯、番茄粟米紅蘿蔔湯、白蘿蔔排骨湯、青蘿蔔馬蹄無花果瘦肉湯、清蒸肉汁、薑葱魚片湯、黑豆木瓜魚尾湯等等；仲有一系列甜茶、甜品或糖水，芝麻糊、核桃糊、紅豆沙、綠豆沙、薏米水、百合雪梨雪耳等等；仲可以用上一系列水果、蔬菜、乳酪打成汁。

有一病案分享，長年胃脹、胃痛、口乾、疲累病人，所謂「虛不受補」嘅人，唔用中藥轉用食療，簡單一味肉汁，已經將以上症狀解決。

「虛」「必定」「補得上」！睇你識唔識補，其實自行用藥，倒不如用藥食同源嘅食材，有效，而且唔容易整壞身體！