豆漿
買咗新玩具：手提攪拌機，今朝試整豆漿，成功。
—————————————
絕經期前後婦女，都會建議多飲豆漿或者食豆製品，有助緩解更年期潮熱、乾澀症狀，有效成份係大豆異黃酮，有類雌激素作用，同樣地，中醫所指黃豆性味甘平，無毒，歸心脾經，有潤燥作用。痛風人士另外用中藥處理吧。
—————————————
而停經後婦女更易罹患骨質疏鬆，想減輕骨質流失，亦可多飲豆漿。另外，骨質疏鬆症，需要補鈣、曬太陽、負荷式運動。補鈣食物係芝麻、果仁、連殼連骨食用海產例如魚毛、蝦米、罐裝沙甸魚，或西蘭花、秋葵等；曬太陽唔洗作介紹吧？而負荷式運動，指承受體重運動，目的要令長骨受壓，如行山、跑步等，年長嘅可以做原地踮腳或「奀」腳，八段錦最後一式就係呢種運動。
—————————————
絕經期前後症狀，早則可以三十歲開始發生，遲則可以去到九十歲仲有不適，唔好以前停經時無不適，就忽略保養嘅重要性，臨床見太多忽略保養嘅人，舉例有睇傷科時拍片意外發現骨密度變低，有停經時無不適但若干年後長年眼睛乾澀。
—————————————
Comments