傷科、跌打、推拿、按摩
- Melody Doctor of TCM
- Jun 4, 2022
- 3 min read
中醫嘅歷史太悠久，所以傳承落嚟嘅概念、範疇係相互連結，無法絕對分開。
總會有好少睇醫生，新傷嘅時候唔知去邊度搵醫生睇，所以有啲主題要定期幫大家溫故知新。
————————————————————
「傷科」
故名思義就係處理損傷為主嘅學科，主要處理骨、關節、筋肉損傷及疾病，傷科有分「外傷」同「內傷」，外傷係指骨折、甩𦥑（脫位）、筋傷（肌肉、筋腱等軟組織）；內傷係指非骨折嘅骨病、頭顱及內臟損傷。
————————————————————
「跌打」
故名思義就係「跌傷」、「打傷」，跌打又有稱鐵打，即係被鐵打傷或兵器（刀、劍等）傷害，同嶺南（廣東）一帶比較相關，香港納跌打為非物質文化遺產，中國有武術，武術就會引起以上所述損傷，佛山、香港、澳門都有武館，自然有相關文化產生。
————————————————————
「推拿」
「推」「拿」各係一種治療嘅手法，推拿主要係唔用器具單純用手法治療疾病嘅學科，推拿嘅手法多過一百種，常見係「推」、「拿」、「按」、「摩」、「揉」、「壓」、「拍」、「擦」等。
————————————————————
「按摩」
「按」「摩」各係一種治療手法，其實按摩就等同推拿，不過，近代中醫主要以「推拿」（Tuina）成立學科，因為推拿名詞可以同「按摩」（massage）區分開黎，相對中醫特色啲，Massage係全世界都有嘅治療手法，只係各地手法側重點有所不同。
————————————————————
所以，有外傷嘅時候，以上學科都可以應用，以上四類雖然名義上區分，但實際內容唔可以完全分割。傷科主要以推拿及正骨手法為主，會配合內服中藥或外敷中藥；跌打主要係按摩同敷藥治療為主；推拿本身係治療手法，可以用於任何學科，即內科、傷科、婦科、兒科等；按摩基本等同推拿。
————————————————————
但以上治療唔包含針灸，但針灸喺傷科病症，係不可或缺嘅重點治療方法。例如早兩日門診，就收到鈍挫傷引起嘅皮下血腫，必須使用針灸治療，刺絡療法，又可俗稱放血，屬於針灸方法嘅一種，如果呢種皮下血腫只用推拿按摩敷藥，康復時間會延長，甚至無得完全康復。又例如肩周炎，針灸嗰肩三針，重要到不得了，唔用嗰三針，黐連嘅關節基本上撕唔開。
————————————————————
所以，歐陽醫生通常都將門診分開做兩大類，一。內科飲中藥，即係把脈開處方煲茶，我簡稱叫「門診把脈」，walk-in都得；二。治療，最好先預約，因為處理時間較長，要做推拿（俗稱手法）、針灸、正骨、整脊、甚至中藥外敷、中醫理療（中醫都有物理治療，即中藥熏蒸、熱敷、TDP俗稱神燈、電針機等等）。但長骨或較大骨頭骨折一般都係建議去醫院處理，例如粉碎性骨折、橈骨、脛骨骨折等等，一黎係萬一需要手術，可以由門診直接收入醫院，二黎係醫院24小時營運，三黎係X光室同門診相連，唔需要跑幾個地方先幫骨頭照到片，而且即日有報告唔洗等兩日。歐陽醫生嘅傷科門診主要係處理錯位、錯縫為主，例如係肩周炎、拗柴、腰扭傷等微小關節紊亂。
————————————————————
至於係有傷去邊搵醫生睇，只要係你信嘅醫生就得，有啲內科醫生其實會幫你落兩針，有啲你以為係傷科嘅醫生其實全科會把埋脈開藥。無論睇中醫、西醫、物理治療都得，只要你信任佢又確定佢有相關經驗知識就可以。
————————————————————
Comments