拉筋同拉傷嘅關係，係歐陽醫生好想講嘅話題，難得有新聞，我地有個機會認識一下點樣拉筋，又點解會拉傷。
————————————————————
新聞係講拉筋拉到主動脈撕裂，呢個唔係今日探討嘅問題，呢個係特例，單憑新聞好難排除事主有否隱性疾病、心血管疾病或其他誘發原因。
（新聞連結：https://medicalinspire.com/web/posts/77326/【拉筋中風】英32歲女擰頭拉筋致後腦劇痛%E3%80%80求醫揭主動脈撕裂引發中風/）
———————————————————
我地集中討論拉筋與拉傷嘅關係：
「筋」，相對「骨」而言，泛指骨頭以外嘅軟組織，「筋」、「肉」有相似嘅地方，筋尤其指有力、可以發力嘅肉，唔包括「皮」同「脈」。所以，「筋」係包括發力嘅肌肉、筋腱、韌帶、及筋膜。
而拉筋，主要係令上述軟組織保持彈性、保持活力，。拉。筋。並。不。等。於。將。之。拉。長！所以，❌「筋長一寸壽延十年」嚴格黎講係錯誤嘅❌，唔係要越長越好，亦唔係唔拉長由得佢縮，而係要適當伸展！
———————————————————
易筋經裏面有呢一段：
《易筋經》「如筋弛則病、筋攣則瘦，筋靡則痿，筋弱則懈，筋縮則亡，筋壯則強，筋舒則長，筋勁則剛，筋和則康。」
字意翻譯：
弛：鬆懈、怠緩。
病：不健康、損害。
攣：抽搐、卷曲不能伸展。
瘦：肌肉不豐滿、單薄。
靡：分散、靡爛。
痿：痿縮、失去機能。
弱：不夠、不如、差。
懈：不緊張。
勁：堅強有力。
剛：恰好、堅強。
和：相安諧調、平靜。
康：安樂、豐盛。
意思係，筋唔可以太鬆、太散、太無力、太薄弱、太無營養，亦唔可以太緊，以上都係病態，筋係需要一定堅硬、恰到好處，人先會精神同安樂。
———————————————————
所以，唔好再亂噏將筋拉到鬆曬，或者夾硬追求長度將之撕裂。
拉傷係指：
韌帶過份鬆弛，關節就會不穩，最常見係順產後骨盆痛、腰痛；踝關節陳舊性損傷引起嘅反覆扭傷；就係韌帶過份鬆弛嘅惡果。
拉筋，暴力拉錯咗肌腱，就會產生骨頭同肌肉接合點嘅撕裂傷，常見嘅係網球手、哥爾夫球手、肩袖損傷等等；如果係筋強骨弱，就會引起疲勞性骨折。
拉筋，主要係拉肌肉嘅肌纖體同埋拉筋膜，成功將肌肉同筋膜拉長拉鬆兼富有彈性，身體會變好，即係體適能健康。
———————————————————
咁點樣先可以正確咁拉筋？而唔怕拉傷？
1-量力而為，唔好用外力甚至暴力。
2-合適角度，角度錯誤就會拉傷。
3-持之以恒，一步步黎，而且經常拉伸。
4-適當時間，每組伸展可以做30秒，可以多做幾組，唔需要一次追求幾分鐘或以上。
5-不要承受痛楚，拉筋係拉到覺得「緊緊地」就維持住，切忌拉到「見痛」，一有痛楚就要相對回返少少，令人有「繃緊」嘅感覺而絕非「傷痛」嘅感覺，一般拉到痛，已經撕傷超過正常修復範圍，但又唔可以拉得「好輕鬆」，拉唔到位係無效嘅。
6-拉筋嘅過程絕對係撕裂嘅過程，小嘅肌纖維撕裂，休息2-3日可以自行修復，但嚴重嘅撕裂，休息超過3日無法自癒時，請盡早求醫。
7-營養補充，修復撕裂，需要維他命A、B、C、D、E、魚油、蛋白質、鈣、鎂、鋅等，所以，運動或伸展過後需要豐富營養，蔬菜、水果、粗糧、肉類都屬必須。
8-適當休息，要有足夠休息先有時間修復，所以可以安排輪流伸展，例如今日上身，聽日下身，後日脊椎等等，安排足夠休息時間，另一個休息時間係指睡眠充足，「夠瞓」好重要。
———————————————————
拉筋好處係：
1-擴大活動範圍
2-增加肌力
3-降低運動後肌肉酸痛
4-減輕疲勞
5-修長線條
———————————————————
篇文已經太長，有機會再到門診實戰拉傷修復嘅中醫方法。
——————————————————
Comentarios