推拿與治療

推拿與治療

唔少人分唔清推拿係乜，今日想講下。

推拿，分為「推」同「拿」，闡述、說法很多，大家可以將之理解為手法，推拿手法有推、按、揉、拿、搖、㨰、擊、摩、擦、扳等等，因為博文唔係想要寫到令人瞓著嘅理論，具體手法唔形容太多了。

以下係誤區：推拿唔醫病－錯，正確係推拿有治療手法；揼骨係推拿－睇邊個出手做，正規治療可以叫正骨、整脊等；推油即係推拿－推油只係算推拿中其中嘅方法；扭傷搵跌打－急性期唔捽得、中藥唔適合敷太長時間以免過敏，要睇具體皮膚情況，其實針灸、理療都可以醫扭傷。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

推拿，其實分有治療同保健嘅手法，唔少人都分唔清幾時要治療，幾時要保健。

無病無痛，單純係運動前後放鬆、或想助眠、或係久病卧床肌肉萎縮等，適合做保健推拿，只用潤膚油，或配適合香氣嘅精油都可以。

而患有長期痛症嘅，其實比較適合做治療推拿，治療推拿手法上，會針對受傷嘅肌肉、韌帶、甚至係骨膜、或者係錯縫及移位嘅骨頭去做，手法嘅針法性會較強，時而聽到復位嘅聲音，或者治療中痛感會強啲。

而小兒推拿效果十分理想，太細嘅嬰幼兒未適合食中藥，不妨考慮下小兒推拿，具體手法同成人推拿唔同。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

門診見倒病人誤治真係好慘，有推咗一個月關節活動受限嘅，有推咗一排腰行路仲係「gat下gat下」行到機械人咁樣嘅，又有針咗好耐無效果唔知有推拿同骨頭復位嘅。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

希望呢篇可以令大家更了解中醫嘅手法。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Recent Posts