「是藥三分毒」
近黎病人俾咗呢個題目我作解釋，門診有簡單解釋咗一下，但，覺得有必要寫返篇，俾大家參考一下，篇幅有啲長，喜歡可以跳過直接睇結語。
～～～～～～～～～～～～～～～～～～
～～～～～～～～～～～～～～～～～～
淺談「毒性」
西藥藥理會講明，藥物有起效量、中毒量、致死量，簡單易明。而西藥藥盒好多時都會標住「poison」（毒藥）嘅標籤，呢度唔係講盒藥有毒會毒死人，而係講緊盒中藥物應該按適當（按醫囑）使用，有「毒藥」標籤嘅藥物，係受管制藥物，需要醫生處方或者監管下售賣，唔係開架式隨手可得。
～～～～～～～～～～～～～～～～～～
中藥方面，自古一直有「毒藥」呢個概念。距今約2800年前，毒藥多數指藥物，毒多指其藥效；發展到約1300年前，對中藥毒性進行了大毒、有毒、小毒和微毒的分級標記；現代中藥藥典，有每種常用藥材嘅建議用量。
～～～～～～～～～～～～～～～～～～
常見嘅大毒中藥，如下：
生草烏、生川烏、生半夏、生天南星、生附子、水銀、砒霜、雄黃、朱砂、蟾酥⋯等。
因為其毒性，所以有炮製過程，令其毒性減緩，如半夏、南星、烏頭，入湯藥都會用炮製品，而附子，炮製後更要先煎入藥；雄黃、蟾酥以外用為主；朱砂臨床唔會長期服用，而臨床亦有取代品入藥，療效亦佳。
～～～～～～～～～～～～～～～～～～
而有毒藥材，有如：
雷公藤，風濕免疫病常用；貫眾，感冒常用；桃仁，婦科常用；蛇床子、蒺藜，皮膚科常用。
臨床上會掌握好用量，亦唔會長期服用。
～～～～～～～～～～～～～～～～～～
無毒藥，多數係藥食同源：
例如白米、薏米、綠豆、紅豆、黑豆、粟米、西瓜、淮山、連子、桑椹子、龍眼肉、枸杞子、生薑等等。
但，無毒藥品，過量使用同樣可能引起不良反應。過量食用蓮子，可引起胃脹、便秘等。人參長期過量使用，可引起失眠、煩躁不安、血壓升高等，甚至會出現頭暈頭痛、胸悶，皮疹等，即「人參中毒反應」。
～～～～～～～～～～～～～～～～～～
～～～～～～～～～～～～～～～～～～
結語：
藥物嘅使用，係因為「疾病」所「需要」，而藥物嘅使用時長，亦係根據疾病嘅輕重、類別，例如普通感冒，常見用藥2-5日；咳嗽，可能用藥1週至3月不等；胃腸病，單純食積，食數劑便可，但潰瘍性疾病、可能以月計服藥；貧血、脫髮、月經病、婦科腫瘤、腫瘤放化療術後，需要用藥嘅時長會更長。
「藥重病輕」、「病重藥輕」，都解決唔到問題。有病唔肯食藥，拖字訣，病唔會突然康復。而無病，就唔好亂煲藥材湯水，應該係以「食材」入湯，例如蕃茄薯仔肉湯、雜菜湯、紫菜蛋花湯、蒸肉汁、芝麻糊、黑豆漿⋯仲有好多唔同嘅選擇，重點係安全。
如果，對於有病需要以療程黎飲用中藥或服用西藥，覺得有疑問，應該搵你最信任嘅醫生幫你解決疑惑，而唔係簡單以「藥有毒」黎忽視正當用藥需要。
而中藥重金屬嘅問題，直接睇以下呢篇政府宣傳，呢度歐陽醫生就唔重覆再寫喇：
Comments