立秋與保養

立秋與保養

唔止一次被人形容「估唔倒你咁保養」！

我一般會打趣回覆「女人唔補好易老」，朋友又會笑笑口講「男人唔補好易冇」。

健康唔係必然，健康係要用力追求返黎，難過追女仔，我好認真嘎！

今日想講「立秋」

立秋後，建議早晚帶備外套，頸、肩、腰、膝、踝等處，最少保持五至八成係溫暖，否則，吹一吹風，好易流鼻水，八月份天氣係極熱夾雜微寒，容易產生外寒內熱、風燥、溫燥等問題，更容易夾雜暑氣嘅尾巴，夾暑夾濕。

食療保養，唔可以過份滋潤，簡單清潤嘅食品便可，例如雪梨、雪耳、無花果、淮山、木瓜、花旗參等，如果夾雜暑濕，應該清利，例如老黃瓜、西瓜皮等。海參、嚮螺片等可以留到天氣更乾燥時享用。

====================

必須辨證論治，詳情請向中醫查詢！

老黃瓜扁豆赤小豆：老黃瓜1個、赤小豆20克、扁豆20克、紅蘿蔔1條、粟米1條。

蟲草花雪耳百合：蟲草花30克、雪耳1個、百合30克、杞子10克、南杏仁30克。

杞子雪梨雪耳：杞子10克、雪耳1個、雪梨1個，冰糖適量。

無花果杏仁百合：無花果5個、百合15克、杏仁15克。

雪梨西瓜翠衣：西花皮大者半個細者一個、雪梨兩個、冰糖適量。

好肉者加肉適量，亦可用骨頭適量鹹煲；好素者可用黃豆做素湯；血糖敏感者走冰糖淡飲、用蜜棗或湯成後加適量代糖。

====================

Recent Posts