談運動與傷害
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
身邊有好多運動嘅朋友，理論上係越黎越多。
七十年代，興起微肉風，八九十年代，開始流行骨感風格，近二十年來，比較流行健美風。
加上癌症、三高問題等渲染，愛好運動、健康嘅人，有增無減。
有氧運動傳統上最多人接觸，第一門檻低，只要無重大疾病，都可參與，而且，可以費用全免；第二，醫生推薦，骨科、治療痛症為主醫生、物理治療師，無論中西，都會推薦病人去游水，因為自由式可以大大伸展頸肩腰肌，對大部份痛症有效，而且無負重狀態下，腰膝關節問題病人都可在水中随意運動。
但，運動同時，必須注意運動傷害，帶氣運動傷害性低而不等於無。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
預防運動傷害，要注意：
1＞勞逸結合，休息足夠，先可以進行運動。例如剛捱完通宵，不如食些少「晚餐」，瞓醒先再行運動，睡前劇烈運動，會影響睡眠深度，如果，必須運動，可以行簡單嘅放鬆伸展，有入眠。
2＞注意運動強度，運動處方所講嘅係以心率為主作計算，我個人比較主張係循序漸進，因人而異，唔同體質，用身體去感受強度，業餘運動家唔需要下下計，太大壓力了，記住：運動得黎輕鬆傾計、唱歌，代表低強度、運動之餘少少喘，仲講倒嘢，中強度、運動到抖唔倒氣，無能力講嘢，即係高強度。
3＞運動時間，理想係每日30－40分鐘，但，港澳地區，一日先得24個鐘，閒閒地返工都用咗11－15個鐘，休息都唔夠，每日抽一個鐘運動，咪玩啦！按返生活節奏，正常八小時文職雙休工作者，無嬰兒負擔者，實行理想運動時間；24小時輪班工作者，追更日子爭取休息，可以簡單做伸展，大更日子安排多啲時間運動；經常加班者，每日做最少五分鐘伸展運動，有時間就安排多啲時間做帶氧、無氧運動。
4＞運動種類不同，所需肌群有所不同，睇返喜好同想鍛鍊嘅地方，安排唔同運動。例如想練肌肉，長跑就係最佳消肌肉嘅運動，練肌只做長跑，肌肉量為遠唔達標，甚至流失；想練心肺功能，唔係練瑜珈，而係做帶氧運動。
5＞按照正確運動動作，免於運動傷害。例如最多人喜歡嘅長跑，常見就係膝傷、足底傷，想免於傷膝，大腿前、後、側肌群都要充份伸展放鬆，著地點以前腳掌或全腳掌為佳；想免於傷足底，可以放鬆小腿肌群，以及做足底放鬆運動。
6＞運動頻率，肌力訓練，要俾肌肉休息48小時，所以理想係分組運動，最簡單處方係胸背、核心、下肢，中間配合小肌群；帶氧運動，長短、強弱，間歇安排。
7＞營養結合，神經營養有VITB群、VITE、卵磷脂等；肌肉營養有蛋白質、VITC等；軟骨營養，有VITA、軟骨素等；硬骨營養，有VITD、VITA、VITK、鈣、鎂、鋅等；造血營養，VITC、VITB群、蛋白質、鐵等。
8＞按體質所需，針灸、理療、中藥對運動傷害都有防治效果。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
「要身體健康就要勤運動吖嘛！」，我只可以講，係宣傳失誤，過劇運動，捱完通宵唔休息嘅運動，只有傷身而唔係強身。
門診見嘅實例有陰虛嘅、有氣虛嘅，有瘀血嘅－因虛致瘀，亦有氣血兩虛嘅。
點樣增加基礎代謝率，營養師以外可以搵識得營養嘅中醫。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
運動處方有一個原則係：(F.I.T.T.)，運動頻率(Frequency)、運動強度(Intensity)、運動時長(Time)、運動種類(Type)， 大家記一下吧。
運動有三類，有氧、無氧、伸展，三者配合好，體質才會好。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
祝福大家開心運動又免於受害～～～
繼MGM遠足後，我地銀馬見～～～
Commentaires